♥ منتاج المسلسل العــــــــــ supernatural ـــــــــــــالمى من بداية السيزون الاول لنهاية السادس ♥

[debuuu]

مسلسل supernatural








بالطبع المسلسل محفور فى ذاكرة كل محبيه بكل مواسمه وتفاصيله
ولكن ماذا عن مالم نشاهده فى سوبرناتشورال!
على مدار مواسم سوبرناتشورال وكل حلقاته تم حذف وعمل مونتاج واختصار العديد من المشاهد لأسباب مختلفه منها

- حجم المشهد حيث ان الحلقه كلها لها مده لا يمكن تخطيها وبالتالى احيانا يتم حذف او اختصار بعض المشاهد الطويله الغير مؤثرة فى الأحداث بنسبه كبيرة من وجهة نظر المسئول عن تلك التعديلات والمسئول عن العمل
- الشعور بعدم تجانس تلك المشاهد مع اطار الحلقة بعد اكتمال تصويرها ورؤيتها ككيان واحد
- وجود خطأ فى المشهد يستدعى حذفه حتى لو كان ذو اهمية فى الأحداث ولكن لا يمكن الأحتفاظ به ابدا مع وجود خطأ واضح

والموضوع هنا هيكون عرض تفصيلى للمشاهد المحذوفه مع فيديوهات تلك المشاهد من كل المواسم
ولزيادة الأثارة والحماس والتفاعل هيكون هناك مع كل مشهد محذوف استفتاء هل انت متفق مع حذف هذا المشهد ولا انت شايف انه مؤثر فى الأحداث وكان يجب عدم حذفه ؟؟


عايزة اشوف التفاعل بقى

واللى مش هيتفاعل هيشوف ويل الويل منى بقى بصراحة ههههههه

[debuuu]

مشاهد الحلقة الاولى من السيزون الاول

المشهد الأول

الحلقة الأولى من سوبرناتشورال بدات بالطبع بحدث دخول ازازيل لغرفة سام وهو رضيع وقتل والدته مارى بحرقها فى السقف وبعد ذلك ظهر سام وهو فى جامعة ستانفورد بعد مرور 22 عام على هذا الحدث مع صديقته جيسيكا يوم عيد الهالويين ورأيناهم فى المنزل وبعدها فى الحفلة ولكن كان هناك مشهد فى المنتصف وهو سام وجيسيكا وهم فى الشارع فى طريقهم للحفلة وقابلوا صديقهم المرتدى لزى الزومبى الذى كان معهم ايضا فى الحفلة وكان يسأل سام لماذا لا يلبس بدلة للهالويين ومن هذا الذى لا يحب الهالويين


المشهد الثانى


هو مقطع لم يحذف بالكامل ولكن تم حذف مشهد بالمنتصف وهذا المشهد بسبب حذفه تم اثارة تساؤل كبير عند كل متابعى المسلسل وكان هذا التساؤل هو عندما عاد دين لسام لينقذه من النيران وقت حرق جيسيكا ما الذى كان سبب عودته من الأساس
وكانت اجابة هذا التساؤل فى المشهد المحذوف اللى اظهر ان دين بعد تركه لسام حصل تشويش فى جهاز الراديو بالسيارة وساعته توقفت فشعر بالخطر وان هناك شىء يحدث فعاد للأطمئنان على سام

- سبب حذف هذا المشهد رغم اهميته فى الأحداث هو وجود خطأ واضح وهو ان من المفترض ان دين كان عائد بالسيارة وحيدا ولكن وقت عودته بالسيارة تبين كأنه يوجد اثنان فى السيارة وليس دين وحده


المشهد الثالث


مشهد النهاية بعد موت جيسيكا وهو مشهد لم يتم حذفه تماما ولكنه تم اختصاره حيث ان المشهد اللى نزل فى الحلقة كان ان دين ذهب لسام ومقالش ولا كلمه وسام قال احنا ورانا عمل نقوم به لكن المشهد الأصلى اللى تم اختصاره كان من المفترض ان دين ذهب لسام وسأله كيف حالك وسام قاله انا بخير وبعدها قال هيا ورانا عمل نقوم به بجانب رؤيتهم بيتحركوا بالسيارة مع موسيقى تصويريه وده ايضا مجاش فى الحلقة

[debuuu]

مشهد الحلقة الثانية من السيزون الاول



- الحلقة بتاعة مخلوق الوينديجو اللى بيخطف الناس فى الغابة وبيتغذى عليهم
- المشهد المحذوف هو لسام ودين فى الغابة مع هايلى واخوها اللى كانوا بيدوروا على اخوهم تومى واخو هايلى شاف رسمه على شجره وسام راح يشوفها وقال ان ده بيمثل الهنود القدامى وانهم اختفوا فجأة ومحدش يعرف ليه وبعدين سام قال انا اعرف هذا الرمز


مشهد الحلقة الرابعة من السيزون الاول


- المشهد المحذوف هو مشهد وصول سام ودين للمطار وقبل دخولهم سام قال لدين هل هتدخل بالسلاح للمطار فدين حط السلاح فى شنطة العربية وهو مخنوق وبص لسام وقاله الأن اشعر انى عارى


مشاهد الحلقة السابعة من السيزون الاول
- حلقة رجل الخطاف اللى كانت روحة مرتبطه برورى ويقوم بقتل من تراهم رورى مخطئين
والفيديو فيه 3 مشاهد محذوفه من الحلقه


المشهد الاول

مشهد قتل صديق رورى وده واضح انه مش اتحذف ده تم اعاده تصويرة بالكامل مع اختلاف بسيط فى الأحداث حيث ان فى المشهد المحذوف لبس رورى مختلف عن المشهد اللى جه فى الحلقة والأحداث مختلفه عن اللى نزل فى الحلقة



المشهد الثانى

مشهد سام وهو بيستعلم عن والده وبعدها حواره مع دين ورؤيتهم لجريمة القتل فى الجريده والمشهد فيه سام بيقول رقم شاره علشان يدوله المعلومات وكانت الشاره دى لبنت ولما قال الأسم للى معاه على التليفون رد وقال نعم ده اسم اولاد لأن طبعا الأسم اللى كان على الشاره اسم بنت وبعدين قفل التليفون وهو مخنوق من دين لوضعه فى المواقف المحرجه دايما وطبعا ده منزلش فى الحلقة واللى جه فى الحلقه سام وهو بيقفل التليفون وهو متضايق فقط وتكملة المشهد بحوار دين مع سام ان والدهم مش عايزهم يلاقوه وكلامهم عن القضيه الجديدة كمان كأن تم اعادة صياغته حتى المقاله اللى كانوا فاتحين عليها وبيقروا منها تفاصيل الحادث كانت فيها صورة الضحية مختلفه فى المشهد المحذوف عن المشهد اللى نزل فى الحلقة



المشهد الثالث

مشهد لرورى تقريبا وهى بترتب ملابس والدها ولقت ورقه غريبه كده مفهمتش بتمثل ايه

[debuuu]

مشهد الحلقة التاسعة من السيزون الاول


- حلقة عودة سام ودين لمنزلهم القديم بعد رؤية سام لسيدة تصرخ لطلب المساعده فى هذا المنزل




- المشهد المحذوف هو تكملة حوار سام ودين مع الرجل اللى كان هو ووالدهم جون شركاء فى الجراج وهنا قالهم انه علاقته بجون لم تنته جيدا حيث انه طلبله الخدمات الأجتماعية "جهة رقابية للتأكد من الحياة الجيدة للناس ولها اهتمام بالأطفال وتعامل عائلاتهم معهم" فرد دين بنرفزة علشان والده جون طبعا وقاله وليه عملت كده فرد عليه وقال لأنه كان باع نص الجراج الخاص به علشان يشترى اسلحه وانه شاف ان اولاده فى خطر ولكن جون بعدها مباشرة اخد الولدين واختفى ومشافوش تانى ولكنه بيفتكره من وقت للتانى وبيتمنى انه يكون عدى المرحله دى بسلام فرد عليه دين بنرفزه وقاله يمكن لأ يمكن تم طعنه بواسطة صديق فسام لحق الموقف وانهى الحوار وقال للراجل شكرا لك انت كنت حقا مساعد جدا

[debuuu]

مشهد الحلقة الحادية عشر من السيزون الاول


- حلقة الفزاعة لما كان اهل مدينه كل سنة بيقدموا زوج لأله وثنى ساكن الفزاعه كتضحية


- مشهد حوار دين مع الزوج اللى كان عليه الدور فى التضحية ومحاولة تحذيرهم وعدم تقبلهم لكلامه تقريبا حصل اعاده لتصوير المشهد ككل لأن فى اختلاف شوية فى الأداء وفى جزء اتقطع تماما وهو ان بعد دخول الظابط قال لدين تعالى معايا وبعدها وقف وقاله انت جاى عليك شكاوى كتير فى المدينة فدين رد عليه وقاله يعنى عايزنى امشى من هنا والظابط قال نعم لكن فى الحلقة جه بس ان الظابط قال لدين تعال معى علشان ميخليش اليوم اسوأ بالنسبه له وخلص المشهد على كده واللقطه اللى بعدها كان دين ماشى بعربيته وعربية بوليس وراه للتأكد من بعده عن المدينه

[debuuu]

مشهد الحلقة الثانية عشر من السيزون الاول


- حلقة حاصد الأرواح اللى تم التحكم فيه بتعويذه من زوجة روى لتبديل الأرواح ومعالجة الناس بموت اخرين

- المشهد الأصلى كان المفروض يتم عرض موت الشخص اللى اتبدلت روحه مع دين ولكن بعدين تم حذف الجزء ده لجعل الأمور اكثر غموضا فى بداية الحلقة وعدم التوضيح من البدايه امر تبديل الأرواح

[debuuu]

مشهد الحلقة الرابعة عشر من السيزون الاول


- حلقة الرؤى اللى كان سام بيشوفها عن ماكس اللى بيقتل عائلته بسبب تعذيبه من وهو طفل واكتشاف سام ان ماكس ايضا ماتت والدته فى حجرته بنفس الطريقة اللى ماتت بها مارى والدة سام

- المشهد مش محذوف هو تم اعادة تصويره وده واضح من خلال اختلاف طريقة دين وهو بيقول لماكس يجب ان تتخطانى اولا وكمان طريقة تمثيل الموت بعض ضرب الرصاص على رأس دين

[debuuu]

مشاهد السيزون الثانى
المشهد الاول فى الحلقة الاولى

- الحلقة الأولى من الموسم الثانى واللى فيها دخول سام ودين ووالدهم للمستشفى بعد حادث السيارة فى نهاية الموسم الأول ودخول دين فى غيبوبة ومطاردة حاصدة الأرواح تيسا له قبل ان يقوم جون ببيع روحه لأنقاذه

- مشهد دين وهو يمشى فى المستشفى كروح وبالطبع عدم رؤية احد له وفجأه شاف فتاة تغير ملابسها للكشف ثم فجأة قامت الطبيبة بقفل الباب وفضل دين يفكر هيكون غلط لو يستخدم كونه شبح لعبور الباب وفى الوقت اللى قرر فيه يدخل مسك ايده رجل جسمه مليان دم وبيقوله انقذنى متخلينيش اموت ودين كان مستغرب انه شايفه ولسه بيبص حواليه علشان يشوف يساعده ازاى راح اختفى الرجل


المشهد الثانى فى الحلقة الاولى


- مشهد اخر للرجل المغطى بالدماء وهو بيكلم دين وبيقوله ينقذه وميخليهوش يموت ثم اختفاءه مره تانيه فى الوقت اللى بدأت فيه تيسا تنادى وتقول حد شايفنى زى ما جه فى الحلقة


بالنسبه للمشاهد المحذوفه من الحلقة دى فهى مرتبطه بالرجل المغطى بالدماء اللى يبدو انه كان له قصه فى الحلقة ولكن تم حذفها تماما ربما بسبب الوقت بما ان الحلقة كانت مليئه بالأحداث او ربما لأنه كان شىء مش محكم قوى ومش متناسق مع احداث الحلقة القوية


مشهد الحلقة الثالثة فى السيزون الثانى


- حلقة مصاصى الدماء اللى قرروا ان لا يقتلوا البشر وكانوا يعيشون على استنزاف دماء الماشية وهى اول حلقة لظهور جوردون الصياد


- مشهد لسام ودين وهما فى حجرة الفندق بعد رؤيتهم لجثة الفتاة واكتشافهم انها مصاص دماء وفى المشهد سام بيحاول يفهم ايه اللى بيحصل وكان بيقول لدين هنا فى حد بيقتل مصاصى الدماء وكان دين بيرد انه مش مهتم بده المهم انهم لازم يلاقوا مصاصى الدماء ويقتلوهم لكن سام استمر فى التفكير وفضل يقول مش غريب ان الفتاة دى اللى هى مصاص دماء هى اول ضحية وكان يقصد يعنى ان ازاى مفيش حد مات بسبب مصاصى الدماء دول ودين اعترض على كلمة ضحية وقال لسام ان ده وصف مش فى محله تماما وسام استمر وقال فين ضحايا مصاصى الدماء ودين قاله يمكن بياخدوهم العش بتاعهم وبيتغذوا عليهم وسام قال معتقدش لأن طبقا لسجلات المفقودين فالوضع طبيعى ولكن دين قال انا ميهمنيش ده انا يهمنى انى اقتل بعض مصاصى الدماء وهنا سام قاله متفهمنيش غلط انا يهمنى انك تكون سعيد بس تصرفاتك دى وتظاهرك بالسعاده بعد ما حدث لوالدنا مش مقنع وهنا رد دين على سام وقاله انا بستمتع بشغلى وياريت انك انت كمان تحاول تعمل ده يوم من الايام


*سبب الحذف اعتقد بما ان المشهد بدون اخطاء والاداء فيه كان جيد فالسبب كان اختصارا للوقت خصوصا ان احداث المشهد تلخيصها فى امرين هيتم عرضهم من خلال باقى احداث الحلقه وهما اولا رغبة دين فى قتل المخلوقات بغض النظر هى خطر على البشر او لأ وثانيا كلام سام لدين انه بيتصنع السعادة وانه معندوش مشكله بعد موت والدهم وانه بيكذب على نفسه

[gg Guy]

مجهود رائع شكرا فعلا

[debuuu]

المشاركة الأصلية كتبت بواسطة gg Guy مجهود رائع شكرا فعلا

ميرسى ليكى حبيبتى
دا من زوقك